22 ფილმი, რომელსაც 2022 წელს ყველაზე მეტად ველოდებით

2020 თუ კინოთეატრების დახურვისა და ზოგადად კინოსამყაროს ლამის მთლიანად გაჩერების წელი იყო, 2021-ში ინდუსტრიამ შეძლო, რომ ეტაპობრივად გამოცოცხლებულიყო და ძალები მოეკრიბა, რისი მეტ-ნაკლებად წარმატებული შედეგი ვიხილეთ კიდეც.

გასულ წელს როგორც ჰოლივუდური, ევროპული თუ აზიური, ისე ქართული წარმოების არაერთი საინტერესო ფილმი ვიხილეთ. ყველა კინომოყვარულს ახლა, ალბათ, იმის გაგების სურვილი კლავს, თუ რას შესთავაზებენ ახალს რეჟისორები შემდეგი 12 თვის განმავლობაში.

ამ სტატიაში სწორედ 2022 წლის იმ განსაკუთრებულ სიახლეებს წარმოგიდგენთ, რომლებიც როგორც ბლოკბასტერების, ისე საავტორო კინოს მოყვარულებს დაგაინტერესებთ:

22. Fantastic Beasts: The Secrets of Dumbledore / ჯადოსნური ცხოველები: დამბლდორის საიდუმლოებანი

ფოტო: Warner Bros.

მართალია, ფილმების ეს სერია ისეთივე კარგი ვერ აღმოჩნდა, როგორიც ჰარი პოტერის ორიგინალი ნაწილებია, მაგრამ ჯადოსნურ სამყაროში სამოგზაუროდ მაინც გამოდგება. თანაც მესამე ნაწილში მადს მიკელსენს ვიხილავთ გრინდელვალდის როლში!

პრემიერის თარიღი: 8 აპრილი

21. Doctor Strange in the Multiverse of Madness

ფოტო: Marvel

სპაიდერმენის მესამე ფილმის შემდეგ, როგორც ჩანს, დოქტორ სტრეინჯს კვლავ მულტივერსთან დაკავშირებული პრობლემების მოგვარება მოუწევს, ოღონდ ამჯერად მას დახმარების ხელს არც მეტი, არც ნაკლები, ვანდა მაქსიმოფი გაუწევს!

პრემიერის თარიღი: 6 მაისი

20. Crimes of the Future / მომავლის დანაშაულები

ფოტო: Getty Images

რამდენიმეწლიანი პაუზის შემდეგ თანამედროვეობის ერთ-ერთი ყველაზე ცნობილი კანადელი რეჟისორი, დევიდ კრონენბერგი ახალ სრულმეტრაჟიან კინოსურათზე მუშაობს, რომელშიც მთავარ როლებს კრისტენ სტიუარტი, ვიგო მორტენსენი და ლეა სეიდუ შეასრულებენ.

პრემიერის თარიღი: ზუსტი დრო ჯერჯერობით უცნობია

19. Black Panther: Wakanda Forever

ფოტო: Marvel

სამწუხაროდ, ჩედვიკ ბოუზმენის გარეშე, მაგრამ მარველის სამყაროს ერთ-ერთი ყველაზე საინტერესო ხაზი მაინც გრძელდება და ვნახოთ, შეძლებენ თუ არა მისი შემოქმედები თავდაპირველი შთამბეჭდავი ატმოსფეროს შენარჩუნებას.

პრემიერის თარიღი: 11 ნოემბერი

18. Bones & All / ძვლები და სხვა ყველაფერიც

ფოტო: Yannis Drakoulidis

Call Me By Your Name-ის რეჟისორმა, ლუკა გუადანინომ ახალი ფილმი გადაიღო კვლავ ტიმოთი შალამეს მონაწილეობით. ფილმი ამავე სახელწოდების ცნობილ ბესტსელერ წიგნს ეყრდნობა, რომელიც რომანტიკულ საშინელებათა ჟანრს განეკუთვნება.

პრემიერის თარიღი: ზუსტი დრო ჯერჯერობით უცნობია

17. Legally Blonde 3 / ქერათმიანი ადვოკატი

ფოტო: Everett Collectio

რიზ უიზერსპუნი თავის საკულტო როლს უბრუნდება და ჩვენც ერთი სული გვაქვს, ამ ყველასათვის საყვარელი კომედიის გაგრძელება ვიხილოთ.

პრემიერის თარიღი: 20 მაისი

16. Women Talking / ქალური საუბარი

ფოტო: Getty Images

ლიტერატურული ნაწარმოების კიდევ ერთი ეკრანიზაცია, რომელიც კანადელი მწერლის 2018 წელს გამოქვეყნებულ ფემინისტურ რომანს ეყრდნობა.

ფილმის სამსახიობო შემადგენლობა თვალისმომჭრელია: ფრენსის მაკდომანდი, კლერ ფოი, რუნი მარა და ბენ უიშოუ.

პრემიერის თარიღი: ზუსტი დრო ჯერჯერობით უცნობია

15. Avatar 2

ფოტო: 20TH CENTURY STUDIOS

2010 წელს გამოსული ბლოკბასტერის შემდეგ, რომელმაც მსოფლიო აალაპარაკა, ჯეიმს კამერონმა გადაწყვიტა, რომ გაგრძელებები გადაეღო: კიდევ ოთხი ფილმის გამოშვებას აპირებს, რომელთაგან პირველს ამ წლის ბოლომდე ვიხილავთ, დანარჩენებს კი 2024, 2026 და 2028 წლებში.

პრემიერის თარიღი: 16 დეკემბერი

14. My Policeman / ჩემი პოლიციელი

მომღერალი ჰარი სტაილსი ახალ რომანტიკულ დრამაში გეი პოლიციელის როლში მოგვევლინება. მას ფილმში პარტნიორობას სერიალის The Crown მსახიობი ემა კორინი გაუწევს.

პრემიერის თარიღი: ზუსტი დრო ჯერჯერობით უცნობია

13. Thor: Love & Thunder / თორი: ჭექა და სიყვარული

ფოტო: chrishemsworth / Instagram

მას შემდეგ, რაც ტაიკა ვაიტიტიმ რაგნაროკი გადაიღო, განსაკუთრებით ველოდებით თორის პერსონაჟის ახალ თავგადასავლებს, რადგან ვიცით, რომ ნიჭიერი რეჟისორის ხელში მხოლოდ ყველაფერი შესანიშნავი გამოდნება.

პრემიერის თარიღი: 8 ივლისი

12. Blonde / ქერა

ფოტო: SplashNews

ერთ-ერთი ყველაზე გამორჩეული თანამედროვე ამერიკელი მწერლის, ჯოის კეროლ ოუტსის ბესტსელერი რომანის Blonde-ის მიხედვით ნეტფლიქსი ლეგენდარული მერილ მონროს შესახებ ბიოგრაფიულ ფილმს იღებს.

მხატვრულ ფილმში მთავარ როლს კუბელი მსახიობი, ანა დე არმასი ასრულებს და გადასაღები მოედნიდან გავრცელებული კადრებით თუ ვიმსჯელებთ, ის იდეალურად მოიხდინა კიდეც როლი.

პრემიერის თარიღი: ზუსტი დრო ჯერჯერობით უცნობია

11. Three Thousand Years of Longing / სურვილის სამი ათასი წელი

ფოტო: Getty Images

Mad Max-ის რეჟისორმა, ჯორჯ მილერმა ფენტეზის ჟანრის რომანტიკული დრამა გადაიღო ტილდა სუინტონისა და იდრის ელბას მონაწილეობით. გადაღებებს პანდემიამ შეუშალა ხელი, თუმცა გასულ წელს საქმე მაინც ბოლომდე მიიყვანეს და ვიმედოვნებთ, რომ ფილმის ნახვის შესაძლებლობა 2022 წლის ბოლომდე მოგვეცემა.

პრემიერის თარიღი: ზუსტი დრო ჯერჯერობით უცნობია

10. Babylon / ბაბილონი

ფოტო: Getty Images

ამ ფილმის ლამის ყველა დეტალი აქამდე გასაიდუმლოებულია, მაგრამ საკმარისია, ვიცოდეთ, რომ მას La La Land-ის რეჟისორი, დემიენ შაზელი იღებს მთავარ როლებში ბრედ პიტითა და მარგო რობით, რომ მას მოუთმენლად დაველოდოთ.

პრემიერის თარიღი: 25 დეკემბერი

9. Killers of the Flower Moon / მთვარის ყვავილის მკვლელები

ფოტო: Apple

მარტინ სკორსეზეს ამ ახალი ნამუშევრის ხილვას ჯერ კიდევ გასულ წელს ველოდით, თუმცა პანდემიამ გადაღებები შეაფერხა და პრემიერის თარიღმაც 2022-ში გადმოინაცვლა.

ის ფაქტი, რომ სკორსეზეს ახალ ფილმში რობერტ დე ნიროსა და ლეონარდო დიკაპრიოს ვიხილავთ, ლოდინად უკვე ნამდვილად ღირს.

პრემიერის თარიღი: ზუსტი დრო ჯერჯერობით უცნობია

8. White Noise / თეთრი ხმაური

ფოტო: Getty Images

ნოა ბაუმბახის Marriage Story 2019 წლის ერთ-ერთი საუკეთესო ფილმი იყო და ამჯერად მაყურებელს გავლენიანი ამერიკელი მწერლის დონ დელილოს გახმაურებული რომანის ეკრანიზაციას შესთავაზებს, რომელშიც კვლავ ადამ დრაივერი თამაშობს და ასევე ცნობილი რეჟისორი და მსახიობი გრეტა გერვიგი.

პრემიერის თარიღი: ზუსტი დრო ჯერჯერობით უცნობია

7. Bardo

ფოტო: SeoJu Park

ოსკაროსანი ფილმების The Revenant და Birdman რეჟისორი ალეხანდრო გონსალეს ინიარიტუ ახალი ფილმით ბარდო ბრუნდება, რომელიც კომედიის ჟანრის იქნება და სიუჟეტი მექსიკაში განვითარდება.

პრემიერის თარიღი: ზუსტი დრო ჯერჯერობით უცნობია

6. Don’t Worry Darling / არ იდარდო, ძვირფასო

ფოტო: Olivia Wilde Instagram

ცნობილი ამერიკელი მსახიობი ოლივია უაილდი აქტიურად აგრძელებს სარეჟისორო კარიერას და ამჯერად ფსიქოლოგიური ტრილერი გადაიღო, რომელიც 1950-იან წლებში კალიფორნიის უდაბნოში შექმნილ უტოპიურ საზოგადოებაზე მოგვითხრობს.

ფილმში მთავარ როლებს Midsommar-ისა და Little Women-ის ვარსკვლავი, ფლორენს პიუ, ცნობილი მომღერალი ჰარი სტაილსი და კრის პაინი ასრულებენ.

პრემიერის თარიღი: 23 სექტემბერი

5. Disappointment Blvd. / იმედგაცრუების ბულვარი

ფოტო: Getty Images

ფლორენს პიუ ვახსენეთ და აქვე უნდა ვთქვათ, რომ თანამედროვეობის ერთ-ერთი ყველაზე საინტერესო ახალგაზრდა რეჟისორი არი ასტერი, რომელმაც მაყურებელზე უკვე წარუშლელი კვალი დატოვა ფილმებით Hereditary და Midsommar, ახალ კინოსურათზე მუშაობს, რომელშიც მთავარ როლს ხოაკინ ფენიქსი ასრულებს.

როგორც ცნობილია, გადაღებები უკვე დასრულებულია და იმედი გვაქვს, რომ ფილმის შეფასებას 2022-ში შევძლებთ.

პრემიერის თარიღი: ზუსტი დრო ჯერჯერობით უცნობია

4. Poor Things / საბრალოები

ფოტო: Getty Images

გახმაურებული ფილმების DogtoothThe Lobster და The Favourite რეჟისორი, იორგოს ლანთიმოსი მალე ახალ სრულმეტრაჟიან კინოსურათს წარმოგვიდგენს, რომელშიც მთავარ როლებს ემა სტოუნი, უილემ დეფო, მარკ რუფალო და მარგარეტ ქუალი ასრულებენ.

პრემიერის თარიღი: ზუსტი დრო ჯერჯერობით უცნობია

3. The Northman / ჩრდილოელი

ფოტო: AIDAN MONAGHAN/FOCUS FEATURES

The Witch-ისა და The Lighthouse-ის რეჟისორმა, რობერტ ეგერსმა ახალი ისტორიული ფილმი გადაიღო, რომელიც მაყურებელს მე-10 საუკუნის ისლანდიაში ამოგზაურებს. ფილმში მთავარ როლებს ნიკოლ კიდმანი, ალექსანდრ სკარსგარდი და ანია-ტეილორ ჯოი ასრულებენ.

აღსანიშნავია, რომ ფილმში ასევე ვიხილავთ სახელოვან მუსიკოსს ბიორკს.

პრემიერის თარიღი: 22 აპრილი

2. Nope / არა

ჯორდან პილი, რომელმაც უკვე შეძლო ჩვენი გაოცება ფილმებით Get Out და Us, სულ მალე ახალ ნამუშევარს წარმოგვიდგენს, რომელიც კვლავ საშინელებათა ჟანრის იქნება.

დამატებითი დეტალები ჯერჯერობით უცნობია, რაც ინტერესს კიდევ უფრო გვიზრდის.

პრემიერის თარიღი: 22 ივლისი

1. The Batman / ბეტმენი

ფოტო: Warner Bros. Pictures

ეს ნამდვილად ყველაზე მაღალი მოლოდინების მქონე ფილმია, რადგან რეჟისორი მეთ რივზი საკმაოდ ამბიციური გამოდგა და იმედია, კომიქსის ფანებს გულს არ დაწყვეტს. ყოველ შემთხვევაში, ტრეილერი ნამდვილად საინტერესო სანახაობას გვპირდება.

არ დაგავიწყდეთ, რომ ბეტმენის როლს რორბეტ პატინსონი ასრულებს, ქეთვუმენისას კი — ზოი კრავიცი.

პრემიერის თარიღი: 4 მარტი

ასევე იხილეთ

ვსწავლობთ თანამოსაუბრის აზრების ,,წაკითხვას” მისი ჟესტების მიხედვით

ვსწავლობთ თანამოსაუბრის აზრების ,,წაკითხვას” მისი ჟესტების მიხედვით

ფსიქოლოგებმა უკვე დიდი ხანია დაამტკიცეს, რომ ადამიანის ნამდვილი აზრები და გრძნობები შეგიძლია ამოვიცნოთ მისი არავერბალური …

კომენტარის დატოვება

თქვენი ელფოსტის მისამართი გამოქვეყნებული არ იყო.